Manyela-koaeng a Phutsalatso ena a re litho tse peli tsa sepolesa tse sebetsang mats’olong a ikhethang, li amohiloe lithunya ka likhoka ke senokoane se sa ts’ejoeng li le ts’ebetsong ka Labohlano le fetileng. Tlaleho e re monna ea neng a apere kobo e thokoa, o amohile mapolesa ao lithunya a ba supile ka sa hae ’me a mo fa tsona sa ba sa qela ho leeto. Ona, ke mokhahlelo oa bobeli oa lithunya tse eang le ba sele sepoleseng kaha ho na le tlaleho ea tse ka holimo ho mashome a mabeli tse nyametseng sepoleseng sa lifofaneng. Sepolesa sa Lesotho ha sea fumanahe ho fana ka lehlakore la sona holima litaba tsena ka lebaka la mehala e lla feela empa menyako e butsoe ea Lehakoe la litaba ho le teka. Ho sale joalo litaba tse sa tiisoang kapa ho hanoa ke sepolesa sa Lesotho li re sepolesa sa Figinia Afrika-Boroa, se qhaulitse le ho tokhotsa hampe-mpe, banna ba Basotho ba neng ba ntse ba tsamaea ka 4by4 e ts’oeu, ba fumanoeng ka lithunya tse ngata ka Labots’elela le fetileng. Taba ena, e utloahetse khatisong ea marang-rang ea monna oa Mosotho ea sebetsang sebakeng seo, ea reng e etsahetse moo sepolesa se boleloang se neng se entse thibella ’me sepolesa sa Lesotho ha sea fumaneha ho arabela taba ena, ha sesole se itse ha se leseling la eona ho botsoe sepolesa. Ka lehlakoreng le leng monga koloi e boleloang ’Mantsebo Siki, o re koloi eo ee sebetsang e le nkukele ka har’a toropo ea Butha-Buthe, moqhobi oa eona o ile a e kopa ka le reng o il’o reka furu ka eona Mapolasing ka Labohlano le fetileng, o ntse a sa tsebe moo e teng le moqhobi oa eona empa o tla ea sebakeng se boleloang ho ea etsa lipatlisiso ka eona.