MOAFRIKA FM E HASA MANANEO E LE MAPATLELONG A MASERU

Mananeo a MOAFRIKA FM a mots'ehare, a ile a hasetsoa mapatlelong a motse-moholo Maseru ka Labone la beke ena, e le ha Phutsalatso e itlhahisa sechabeng hore e se tla hasa e le haufi le sona. Thuso Dlamini e ile ea ba pulamaliboho ka lenaneo la Masutsa. Nkhono 'Mathabo Chobokoane le Serame Tau ka lenaneo la Hora ea Litaba, ba ile ba bala le ho qapolla litaba ba mametsoe le ho shebelloa ke Basotho ba neng tlile ho tla boha ha se-ea-le-moea se hasa se le haufi le bona. 'Makearabetsoe Ncholo ebile mokoallo ka lenaneo la maeto la Lekaka-lenyetheli. Basotho ba fapakaneng, ba ile ba kenya letsoho le ho bonts'a thabo ea ho bona baphutsalatsi, ho kenyeletsa le Mohlomphehi Mohlophisi e Moholo. Khaso e ne e le mapatlelong a lebenkele la JET, moahong oa Carlton Centre.