DEMOCRATIC CONGRESS E NTS'ITSE LENGOLO LE POTOLOHANG LA KHETHO EA KOMITI EA BACHA

Seboholi sa lekhotla la Democratic Congress (DC), se re komiti ea bacha ka tumellano le komiti e kholo ea lona, ka Laboraro la beke ena, le nts’itse lengolo le potolohang la khetho ea komiti ea bacha, e ileng ea hloloa ho tsoelapele ka lebaka la seoa sa kokorona. Monghali Serialong Qoo, o re qeto e fihletsoeng ke hore khetho e tla ba ka Phato ho tloha ka la mashome a mabeli a metso e meraro ho isa ho la mashome a mabeli a metso e mehlano monongoaha. Ho sa le joalo, mookameli oa bacha ba lekhotla leo, monghali Pheello Sehlabaka, o re ba ts’oentsoe ke ’muso o litulong ka ho se fetise molao o fetisetsang likhoebo tse nyenyane matsohong a Basotho ho tloha bahoebing ba melata. O re ha ’muso o ka imamella taba ena hantle, e ne e tlilo thusa hore moruo o likolohe ka hare ho Basotho ka har’a naha, hobane melata e mengata e sa boloke chelete ea eona ka har’a litsi tsa pokello ea lichelete tsa naha ena.