MOSHANYANA O FUMANA SETULO SE MABILI KA THUSO EA MOSAMARIA EA MOLEMO

Morena oa Menkhoaneng Ha-Ntholi Selebalo, Leribe, o re moshanyana ea lilemo li leshome le metso e mene, o filoe setuloana se mabili, ke mosamaria ea molemo ea ileng a utloa kopo, eo a e phethahalitseng ka ’Mantaha ona. Morena ’Masempe Selebalo o re o ne a ile a leka ka makhetlo a mangata ho batlela setloholo seo sa mobusuoa oa hae setuloana ho lekala la Nts’etsopele ea Sechaba, lee ho fihlela lena, le ntseng le e-s’o mo thuse. Ea faneng ka setuloana seo, monghali Tieho ’Mamasiane, oa Pela-Ts’oeu Ha-Majara hona seterekeng seo, o itse o thabetse ho fetola bophelo ba moshanyana ea qetileng lilemo tse ngata a holoba ka mpa, ’me le nkhono oa moshanyana o thabile haholo.