BANNA BA BELAELLOANG POLAONG EA RALIKONELO JOKI BA LITLAMONG TSA SEPOLESA SA LESOTHO

Snr. Supt. Mpiti Mopeli, raliphatlalatso oa sepolesa sa Lesotho, o re banna ba bane ba belaelloang polaong ea monghali Ralikonelo Joki, ba litlamong tsa sepolesa sa Lesotho, ba qhaulitsoe lelibohong la borokho ba Maseru ba ne ba ts’elela ka Lesotho bosiung bo selang Laboraro la beke ena. Sena se latela phatlalatso ea sepolesa sa Lesotho, e reng liphuphutso tsa mathomo tsa sona, li sibolotse hore polao e sehloho ea monghali Joki, e amahanngoa le ho se lumellane ka maikutlo le babolli. O re babelaelloa ba tlang ho hlaha ka pele ho makhotla a boahloli, ke Sootho Liphoto ea lilemo li 35 oa Mokema Ha Maama, Kamo Phakoe oa tse 35 oa Jorotane Ha Rapokolana, Mothusi Class oa tse 31 oa Mokema Ha Maama Maseru ha monga koloi le ee pelaelo e leng hore morero ke oa hae, mabitso a bona a tla phatlalatsoa ka khotla. Ba babeli ba bona, Sootho Liphoto le Thuso Class, ba boetse ba belaelloa polaong ea mosebeletsi oa paramente ea Lesotho monghali Mothibe Mothibe ea ileng a thunyetsoa lefu le Thomello Ntsane ea neng a sebetsa mokhatlong oa machaba a kopaneng, moo a neng a tsekisoa hore o oa pahapha hape o na le sethunya.