MONNA O RE O BELAELA MORA OA HAE A LAHLETSOE SEBAKENG SEO A FUMANOENG HO SONA A TIMETSE HO LATELA TLALEHO EA TLHAHLOBO EA SETOPO

Monghali Mokheseng Mots’ets’e oa Roma Ha Mokhohla, Maseru, o re o tsietsoe hore na a tsoele-pele ho boloka mora oa hae, ea ileng a fumanoa a hlokahelletse mateanong a noka ea Mataoa le Liphiring, bekeng ea bobeli ea khoeli ena, a sa tsebe sesosa sa lefu la hae. O re tlhatlhobo ea setopo kamor’a lefu, e re mora o timelitsoe ke leqeba le fumanoeng lehateng, hoo mali a bileng a rothela bokong, ha ho bonahale mofu a khanngoe ke metsi, eleng seo a belaelang hore mora o lahletsoe sebakeng seo. Monghali Mots’ets’e o re se mo makatsang ke hore haa fihla sepoleseng sa Roma, ha hona lepolesa le ts’oereng nyeoe ea mora eo oa hae, ’me matsohong a sepolesa ho teng likobo tsa mora oa hae, tseo a sa tsebeng hore na li fihlile joang ho sona.