Ts’olo Thakeli o lokollotsoe ka beile ea boikaloso holima liqoso tsa ho tokhotsa motho

Lekhotla la ’Maseterata la Maseru ka Labobeli la beke ena, le lokollotse Ts’olo Thakeli ka beile ea boikaloso holim’a liqoso tsa ho tokhotsa motho. Lengolo la qoso le re Thakeli ka thoko ho molao le ka maikemisetso a le hoteleng e ’ngoe ea Maseru, o ile a khakhatha Teboho Masoetsa ka setene, libotlolo le lifeisi, qoso ea bobeli e re o bile a tlontlolla Masoetsa ka ho mo hlobolisa a mo laela ho tsamaea mapatlelong ao a hlobotse, liketsahalong tsa ’Mesa ea monongoaha. Mochochisi o itse nyeoe e salletsoe ke ho ts’oaroa ha ’melaelloa oa bobeli, ’me a tle a khutlele khotla ka la 11 khoeling e tlang. Nyeoe ena e mametsoe ke ’Maseterata Nkhethoa Molapo.