Mohlankana oa Nyakosoba Ha-Chele, ea belaelloang ka peto ea mosali, o litlamong tsa sepolesa sa Roma

Morena oa Nyakosoba Ha-Chele, Maseru, o re mohlankana oa motse oa hae, o litlamong tsa sepolesa sa Roma, ka pelaello ea ho beta mosali oa Ngope-Ts’oeu Ha-Ngaka, ea neng a ilo batla molekane oa hae motseng ka Labots’elela la beke e fetileng. Morena ’Mabotsi Chele, o re mohlankana enoa o ne a ile a kopana le mosali eo tseleng, ’me eo a ’motsa moo molekane oa hae a leng teng, mohlankana a mo isa teng, empa ba fumana a le sieo, ke ha a mo tsohela matla, a re ba ee mabitleng, a ilo ’monts’a bitleng la ’m’ae. O re mohlankana o ile a hulela mosali eo ka har’a jarete ea sekolo le kereke, a mo qobella hore a mo phutlanyetse, ’me ha ba tloha moo, ba kopana le mahokela a ileng a ba isa moreneng, mohlankana a fasoa, ha tsebisoa sepolesa, sa ea mo qhautsa, ’me o re mohlankana eo ke mohlola a li etsa.