MOAHLOLI NATHANE E NE E LE SEKOANKOETLA SA TOKA

Basebetsi ’moho le moahloli Hopolang Nathane ba mo pakile e le sekoankoetla kabong ea toka, khomo ea se kenoa ka mahohle, kaha a ne a sebetsa ka boitelo le boitebalo, hoo a bileng a fuoa boemo ba ho buella Motlotlehi ka mongoaha oa 2002, pele a ka thonyetsoa ho tla ba moahloli oa makhotla a molao lilengoaneng tsa ho feta. Nathane J o timetse ka Labobeli la beke e fetileng, a le tlas’a leihlo le nchocho la lingaka. Moahloli e moholo, Sakoane Sakoane, o itse o tla hopola Seoli sa habo ka linyeoe tse peli tseo a neng a fane ka kahlolo holim’a tsona bosebeletsing ba hae ba nako e khuts’oanyane e le moahloli oa Lekhotla le Phahameng, Tsifa-Li-Mali Leribe. E ’ngoe ea linyeoe ke e hlakisitseng mekhoa e nepahetseng ea ho hlongoa ha mephato, ha ea bobeli e ne e hlalosa phapano lipakeng tsa sekolo le setsi sa koetliso. Nathane J o siea barali ba bararo, mora a le mong le molekane. O tla bolokeloa Teyateyaneng Ha Ntjabane, Berea ka Labohlano lena. Ts’ebeletso ea lepato la hae e tla qala ka hora ea borobeli hoseng.