Mok'hanselara o phallela malapa a fefohetsoeng ke matlo, Teraehuku Berea

Bo-nkhono ba babeli ba Teraehuku Ha-Lebese, Berea, ba re ba lakalletsa mok’hanselara Sekete Ntabejane, bophelo bo bolelele, ha a tsebile ho rulela matlo a bona a ileng a nkoa ke sefefo sa moea se bileng ka Lapele la beke e fetileng. Nkhono ’Mapitso Sehole le ’Masenkhane Senkhane, ba re ba qala ho bona ngoan’a motho ea ba etselitseng mosebetsi o babatsehang hakaalo, hobane ha ho le ka mohla ba kileng ba bona o joalo mohlolo. Litabeng tsena, mok'hanselara Sekete Ntabejane o re ke matlo a mahlano a ileng a fefoha letsatsing le boletsoeng, ’me o fane ka thuso ea mapolanka le samente ho oona kaofela hore a ruleloe, ’me o entse tsena ka ts’ehetso ea molekane oa hae.