Bahlanka ba neng ba tokhotsa Bokang Tsoako ba mo hloele setha, ba supiloe ke komisi ea liphuputso tsa litlhokofatso tsa bats’oaruoa

Komisi ea liphuputso tsa litlhokofatso tsa bats’oaruoa ka Labobeli la beke ena, e supile bahlanka ba neng ba hloele Bokang Tsoako setha, ba mo tokhotsa ka melamu nakong ea ho fihla ha hae setsing, a ts’oeroe ka mora ho baleha chankaneng mafelong a selemo se fetileng. Snr Supt. Tsietsi Mahlelebe a tataisoa ke komisi khatisong ea bobeli ea marang rang a setsi, o supile le ho bolela liofisiri tse latelang, ele tsona tse tokholitseng Tsoako, Chief Officer Possa, chief officer Marai, Sgt. Raboshabane, officer Marebole, Nthonyane, Kheleli, Mpokoti ea neng a thulanya mots’oaruoa ka lebota, ha Soatsi le Ramangoane ba hlaha ba sireletsa mots’oaruoa ho banna ba neng ba mo thulanya ka marako a chankana, ba mo pola ka melamu, bang ba mo otla ka lifeisi. Rats’etse ka ’muelli oa hae, o latotse bosehla hore ke eena a bonoang a le mahlaha-hlaha, a otla bats’oaruoa ka lifeisi. Mots’oaruoa eno o bile a timela, ’me tlaleho ea ngaka e hlalosa a shoele lefu la matsoho, a le matetetso, mali a rothetse bokong. Komisi e bile ea fetisa mantsoe a teboho ho bahlanka ba setsi seo, e leng Supt. Ramangoane, Koenene, Soatsi le ba bang ba hlahang ba leka ho sireletsa le ho thibela tlolo ea molao. Komisi ea benghali Realeboha Mathaba, Kelebone Maope le Mojalefa Thulo, e tla tsoelapele ka likhatiso tse ling ka Laboraro la beke ena.