Monna o re mosali o mo bolaisa lehare ha barobetse

Monna oa Phuthiatsana Ha-Jimisi Maseru, o re malome oa molekane oa hae o mo siile ka mantsoe a mo ts’ositseng le ho bea bophelo ba hae tsietsing ka mor’a hore a re ha a sa batla ho phela le eena hobane a mo bolaisa lehare ka mahetleng, ha ba robetse. Monghali Thuso Motopi, o re tsena li tla ka mor’a hore malome oa molekane oa hae le lelapa la bo, ba kopanele taba ena eo a reng e se e le ka makhetlo a joetsa mosali oa hae hore a tlohele ho mo seha ka lehare, empa a re ha a e-so etse taba e joalo. Leha ho le joalo, ’Maletsatsi Mants’a, o re monna oa hae o mo etselletsa ka leshano, ho teng, ba ee ba hlatsoane ka mahetleng, joale monna a utloe eka ho na le hoo a mo sehang ka hona ha a mo hohlola lekhopho ka seo e-bang o mo hlatsoa ka sona. Litabeng tsena, malom’a ’Maletsatsi, monghali Polasi Matabane, o re molli ke eena ea ntseng a ikenyetsa matsoalo, ha ho na moo a mo ts’ositseng teng, empa o itse litaba tseo ha se moqeti oa tsona o tla tsebisa ba habo moamani le molekane eo oa hae.