IEC E HLAKOLA LIPHATHI TSE MASHOME A MABELI LENANENG LA NGOLISO EA EONA

Komisi e Ikemetseng ea Likhetho, IEC, e pheshetse liphathi tsa lipolotiki tse mashome a mabeli lenaneng la eona la ngoliso ea liphathi, ka le reng ha li ikobele molao le tsamaiso ea komisi, ho rialo Raliphatlatso oa komisi. Monghali Tuoe Hants’i o re har’a lipehelo tseo liphathi tsena li sitiloeng ho ikobela tsona, ho kenyelletsa ho thethebala ha liofisi tsa tsona, ho se hlakisi litaba tse amanang le botho le litlaleho tsa ts’ebeliso ea lichelete, har’a tse ling. Ntle ho moo, o re liphathi tse mashome a mabeli a metso e ts’eletseng ho tse mashome a mane a metso e robeli tse ngolisitsoeng le komisi, li ntse li phenngoa mahafi, ’me li se li ngolletsoe mangolo a ho li ema maqothe hore li ikamahanye le lipehelo tsa komisi. Liphathi tse hlakotsoeng ke tse latelang: Hamore, Ts’epo Ea Basotho, People’a Convention, Alliance of All Basotho Victims, Majalefa, White Horse, Sankatana, All Democratic Corporation, Basotho Batho Democratic, Community Freedom Movement, Revolutionary Alliance of Democracy Tru Reconciliation Unit, Development Party oa Lesotho, Prayer Shawl and Light, Progressive Democrats, Tsebe Social Democrats, Your Opportunity and Network Alliance, Lekhotla la Mekhoa le Meetlo, Basotho Thabeng ea Sinai le Cry Not Child.